В единстве с Богом!
Поиск






Канон молебный ко Пресвятой Богородице изрядный

Творение благочестивейшаго царя господина Луки Феодора Ласкаря

Cей канон поется по подобию и чину канона молебнаго Воду прошед:

Глас 8-й.

Песнь 1-я.

Ирмос: Колесницегонителя:

Припев: Пресвятая Богородице, спаси нас.

Скорбных наведения обуревают смиренную мою душу, и напастей облацы мое покрывают сердце, Богоневестная, но Свет Рождшая Божественный и Превечный, возсияй мне свет радостный.

Припев: Пресвятая Богородице, спаси нас.

От безмерных нуждей и скорбей и от врагов лютых и от напастей житейских избавлься, Всепречистая, крепкою силою Твоею, воспеваю, величаю безмерную Твою милость и еже ко мне Твое утешение. Слава Отцу и Сыну и Святому Духу. Ныне надеяся, к Твоему прибегох заступлению крепкому и к Твоему Покрову вседушно притекох и колена приклоняю, Владычице, и плачу, и стеню: не презри мене, окаяннаго, христианом Прибежище. И ныне, и присно, и во веки веков. Аминь. Не умолчу вопити яснейше величия Твоя, яще бы не Ты, Отроковице, всегда предстояла еси, о мне молящи Сына Твоего, кто бы от толиких бурь и лютых бед избавил мя?

Песнь 3-я.

Ирмос: Небеснаго круга:

Припев: Пресвятая Богородице, спаси нас.

Недоумевый от всех, болезненно зову Ти: предвари теплое предстательство и Твою помощь даждь ми, рабу Твоему, смиренному и окаянному, Твоего заступления ищущему тепле.

Припев: Пресвятая Богородице, спаси нас.

Удивила еси воистинну ныне на мне, Владычице, благодеяния Твоя, Отроковице, и милости Твоя, темже славлю Тя, и воспеваю, и почитаю многое и безмерное смотрение Твое. Слава Отцу и Сыну и Святому Духу. Буря мя обуревает напастей, Владычице, и скорбных треволнения погружают, но предваривши, руку ми даждь помощи, теплое заступление и предстательство Твое. И ныне, и присно, и во веки веков. Аминь. Истинную Богородицу исповедуя, Владычице, Тя, смерти державу потребившую, яко бо оживляющую, от уст адовых к животу возвела еси мя, в землю текшаго.

После третией песни поем:

Спаси от бед, рабы Твоя, Богородице, яко вси по Бозе к Тебе прибегаем, яко к нерушимей Стене и Предстательству. Призри благосердием, Всепетая Богородице, на мое лютое телесе озлобление, и исцели души моея болезнь. Господи, помилуй, трижды. Слава, и ныне.

Седален, глас 2-й:

Моление теплое и Стена необоримая, милости источниче, мiрови прибежище, прилежно вопием Ти: Богородице Владычице предвари, и от бед избави нас, Едина вскоре Предстательствующая.

Песнь 4-я.

Ирмос: Ты моя Крепость, Господи:

Припев: Пресвятая Богородице, спаси нас.

И где прочее иное обрящу заступление, камо прибегну, где же и спасуся, кую теплую возъимам Помощницу, скорбьми житейскими и бурями, увы, мне колеблему, на Тя Едину уповаю, и дерзаю, и хвалюся, и притекаю к Покрову Твоему, спаси мя.

Припев: Пресвятая Богородице, спаси нас.

Реку сладкую милости Твоея, богатыми дарми оросившуюся, окаянную и смиренную душу мою, Всечистая, напастей и скорбей пещию сожженную, величаю, проповедую и притекаю к Покрову Твоему, спаси мя. Слава Отцу и Сыну и Святому Духу. Тя, Чистую, Тя, Деву и Нескверную, Едину имам Стену необоримую, Прибежище, Покров крепкий, Оружие спасения, не презри мене, блуднаго, Надеждо ненадеемых, немощствующих Помоще, оскорбляемых радосте и заступление. И ныне, и присно, и во веки веков. Аминь. Како изрещи Твоя по достоинству возмогу безмерныя щедроты, о Владычице,яже мою смиренную душу, люте оскорбляемую, яко воды обышедшия, но, о Твоего промысла и благодеяния, егоже безумно, окаянный, погубих.

Песнь 5-я.

Ирмос: Вскую мя отринул еси:

Припев: Пресвятая Богородице, спаси нас.

Благодарно вопию Ти: радуйся, Мати Дево, радуйся, Богоневесто, радуйся, Божественный Покрове, радуйся, Оружие и Стено нерушимая, радуйся, Предстательство и Помоще и Спасение иже к Тебе притекающим верою.

Припев: Пресвятая Богородице, спаси нас.

Благодарно вопию Ти: радуйся, Мати Дево, радуйся, Богоневесто, радуйся, Божественный Покрове, радуйся, Оружие и Стено нерушимая, радуйся, Предстательство и Помоще и Спасение иже к Тебе притекающим верою. Слава Отцу и Сыну и Святому Духу. Ненавидящия мя всуе, стрелы и мечи и ров уготовиша и ищут всеокаяннаго моего тела исторгнути и низвести в землю желают, но от сих, Чистая, предваривши, спаси мя. И ныне, и присно, и во веки веков. Аминь. Кий Тебе дар принесу благодарения, за яже насладихся Твоих дарований и Твоея безмерныя благостыни, темже убо славлю, песнословлю и величаю Твою неизреченную ко мне милость.

Песнь 6-я.

Ирмос: Молитву пролию ко Господу:

Припев: Пресвятая Богородице, спаси нас.

Облацы скорбных покрыша окаянную мою душу и сердце, и помрачение вводят мне, Отроковице, но Рождшая Свет Неприступный, отжени сия далече, дерзновением Божественныя молитвы Твоея.

Припев: Пресвятая Богородице, спаси нас.

Утешение в скорбех вем, и недугов Врача Тя знаю, и всесовершенное Сокрушение смерти, и Реку живота неисчерпаемую, и всех, сущих в напастех, скорое и быстрое заступление. Слава Отцу и Сыну и Святому Духу. Не скрываю глубины Твоея милости, и ток безмерных чудес, и Источник Приснотекущий воистинну яже ко мне милости Твоея, Владычице, но всем исповедую, и вопию, и проповедую, и вещаю. И ныне, и присно, и во веки веков. Аминь. Обыдоша мя житейския бури яко пчелы сот, Дево, и мое содержащее сердце уязвляют стрелы скорбей, но да обрящу Тя Помощницу, и Гонительницу, и Избавительницу, Всепречистая. И поем, как и после третией песни: Спаси от бед, рабы Твоя, Богородице, яко вси по Бозе к Тебе прибегаем, яко к нерушимей Стене и Предстательству. Призри благосердием, Всепетая Богородице, на мое лютое телесе озлобление, и исцели души моея болезнь. Господи, помилуй, трижды. Слава, и ныне.

Кондак, глас 6-й:

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя. Икос: Простри длани Твоя, имаже всех Владыку, яко Младенца, прияла еси, за множество благости, не остави нас, всегда надеющихся на Тя. Бодренною Твоею молитвою и неисчетною простынею ущедри нас, и подаждь нам милосердие Твое, во веки источающи: Тебе бо имамы грешнии Заступницу от находящих на ны бед и зол. Но яко имущи милосердия щедроты, ускори на молитву и потщися на умоление, предстательствующи присно, Богородице, чтущих Тя.

Песнь 7-я.

Ирмос: Отроцы еврейстии в пещи:

Припев: Пресвятая Богородице, спаси нас.

Свет Рождшая, Владычице, помраченна мя нощию грехов просвети, Ты, Света сущи Приятелище, Чистая и Непорочная, да любовию Тя славлю. Припев: Пресвятая Богородице, спаси нас. Покров буди и Предстательство и Заступление, и Похвала, Дево, обнаженну мне ныне всякия помощи, безпомощных Сило и Надеждо ненадеемых. Слава Отцу и Сыну и Святому Духу. Всею душею и мыслию и сердцем и устнами Тя славлю, насладився Твоих великих дарований, но, о Твоея Благостыни и безмерных Твоих чудес. И ныне, и присно, и во веки веков. Аминь. Виждь милостивым оком Твоим, и посети озлобление, еже имам, и лютых напастей, и вреда, и бед, и от искушений мя избави безмерною милостию Твоею.

Песнь 8-я.

Ирмос: На горе святей Прославльшася:

Припев: Пресвятая Богородице, спаси нас.

Благоутробия ради милости Твоея, Дево, не презри, Чистая, потопляемаго мене бурею житейских волн, но даждь ми руку помощи, утесняему озлобленьми житейскими.

Припев: Пресвятая Богородице, спаси нас.

Обстояния, и нужды, и скорби обретоша мя, Чистая, и напасти житейския, искушения отвсюду мя обыдоша, но предстани и заступи мя крепким Твоим Покровом. Слава Отцу и Сыну и Святому Духу. В бурях да обрящу Тя Пристанище, в печалех Радость и веселие, и в недузех скорую Помощь, и в бедах Избавительницу, и Предстательницу во искушенних. И ныне, и присно, и во веки веков. Аминь. Радуйся, Престоле огнеобразный Господень, радуйся, Божественная и манноприемная Ручко, радуйся, златый Светильниче, Свеще Неугасимая, радуйся, девам Славо и матерем Украшение и Похвало.

Песнь 9-я.

Ирмос: Ужасеся о сем небо:

Припев: Пресвятая Богородице, спаси нас.

К кому прибегну иному, Чистая, где притеку прочее и спасуся, к кому иду, кое же обрящу прибежище, кое теплое заступление, кую в скорбех помощницу, на Тя Едину уповаю, о Тебе Единей хвалюся, и на Тя, дерзая, прибегох.

Припев: Пресвятая Богородице, спаси нас.

Несть исчислити возможно величия Твоя, Богоневесто, и глубину неиспытательну изрещи паче ума чудес Твоих, совершенных выну, любовию Тя чтущим и верою поклоняющимся, яко воистинну Бога Рождшей. Слава Отцу и Сыну и Святому Духу. В песнех благодарных славословлю и почитаю безмерную милость, и многую силу Твою всем исповедую, и благодеяния Твоя, яже истощила еси на мя, проповедую, величаю душею же и сердцем, и мыслию, и языком всегда. И ныне, и присно, и во веки веков. Аминь. Моление мое прими убогое, и плача моего не презри, и слез, и стенания, но заступи мне яко Благая, и прошения исполни, можеши бо вся, яко Всемощнаго Владыки Бога Мати, аще возмааеши токмо моему окаянному смирению.

И по каноне поем:

Достойно есть, яко воистинну, блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу Тя величаем. Если же есть великий праздник Господень или Богородичен, поем задостойник праздника. И настоящие Богородичны, глас 2-й: Вышшую небес и Чистшую светлостей солнечных, избавльшую нас от клятвы, Владычицу мира песньми почтим. От многих моих грехов немощствует тело, немощствует и душа моя: к Тебе прибегаю, Благодатней, Надеждо ненадежных, Ты ми помози. Владычице и Мати Избавителя, приими моление недостойных раб Твоих, да ходатайствуеши к Рождшемуся от Тебе: о, Владычице мира, буди Ходатаица. Поем прилежно Тебе песнь ныне, всепетой Богородице, радостно: со Предтечею и всеми святыми моли, Богородице, еже ущедрити ны. Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, воеже спастися нам.

Посем Трисвятое. И по Отче наш:

Топари, глас 6-й:

Помилуй нас, Господи, помилуй нас, всякаго бо ответа недоумеюще, сию Ти молитву, яко Владыце, грешнии приносим, помилуй нас. Слава Отцу и Сыну и Святому Духу. Господи, помилуй нас, на Тя бо уповахом, не прогневайся на ны зело, ниже помяни беззаконий наших, но призри ныне, яко Благоутробен, и избави нас от враг наших, Ты бо еси Бог наш, и мы людие Твои, вси дела руку Твоею, и Имя Твое призываем. И ныне и присно и во веки веков. Аминь. Милосердия двери отверзи нам, Благословенная Богородице, надеющеся на Тя, да не погибнем, но да избавимся Тобою от бед, Ты бо еси Спасение рода христианскаго.

После тропарей

Господи, помилуй, 40 раз Слава Отцу и Сыну и Святому Духу, и ныне и присно и во веки веков. Аминь.

И читаем молитву ко Пресвятей Богородице и Приснодеве Марии:

О, Пресвятая Госпоже, Владычице Богородице! Вышши еси всех Ангел и Архангел и всея твари Честнейши, Помощница еси обидимых, ненадеющихся Надеяние, убогих Заступница, печальных Утешение, алчущих Кормительница, нагих Одеяние, больных Исцеление, грешных Спасение, христиан всех Поможение и Заступление! О, Всемилостивая Госпоже, Дево Богородице Владычице, милостию Твоею спаси и помилуй (болящаго) раба Твоего (или: рабу Твою, или: рабов Твоих) имярек, исцели его (или: ю, или их), и подаждь ему ( или: ей, или: им) мир и здравие, ризою Твоею честною защити. И умоли, Госпоже, из Тебе без семене Воплотившагося Христа Бога нашего, да препояшет его (или: ю, или: их) силою Своею Свыше на невидимыя и видимыя враги его (или: ея, или: их). О, Всемилостивая Госпоже, Дево Богородице, воздвигни его (или: ю, или: их) из глубины греховныя и избави его (или: ю, или: их) от напрасныя смерти и от нападения вражия и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабу Твоему (или: рабе Твоей, или: рабом Твоим) имярек и просвети ему ( или: ей, или: им) ум и очи сердечныя, еже ко спасению: и сподоби его (или: ю, или: их), раба Твоего (или: рабу Твою, или: рабов Твоих) Царствия Сына Твоего, Христа Бога нашего, яко Держава Его благословенна и препрославлена, со Безначальным Его Отцем и со Пресвятым и Благим и Животворящим Его Духом, ныне и присно и во веки веков.

Иная молитва ко Пресвятей Владычице Богородице:

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой и воздыхание мое приимет, аще не Ты, Пренепорочная, Надеждо христиан и Прибежище нам, грешным? Кто паче Тебе в напастех защитит? Услыши убо стенание мое, и приклони ухо Твое ко мне, Владычице Мати Бога моего, и не презри мене, требующаго Твоея помощи, и не отрини мене, грешнаго. Вразуми и научи мя, Царице Небесная. не отступи от мене, раба твоего, Владычице, за роптание мое, но буди мне Мати и Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому бо прибегну повинный аз, аще не к тебе, Упованию и Прибежищу грешных, надеждею на неизреченную милость Твою и щедроты Твоя окриляемь? О, Владычице, Царице Небесная! Ты мне упование и прибежище, Покров и Заступление и Помощь. Царице моя Преблагая и скорая Заступнице! Покрый Твоим ходатайством моя прегрешения, защити мене от враг видимых и невидимых. умягчи сердца злых человек, возстающих на мя. О, Мати Господа моего Творца! Ты еси корень девства и неувядаемый цвет чистоты. О, Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление. и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже с упованием глаголю и вопию: радуйся, Благодатная, радуйся, Обрадованная, радуйся, Преблагословенная, Господь с Тобою.

После молитвы:

Аминь. Честнейшую Херувим, и Славнейшую, без сравнения, Серафим, без истления Бога Слова Рождшую, сущую Богородицу Тя величаем. Слава Отцу и Сыну и Святому Духу, ныне и присно и во веки веков. Аминь. Господи, помилуй. Трижды. Господи, благослови.

И отпуст:

Господи, Иисусе Христе, Боже наш, молитв ради Пречистыя Твоея Матери, святых славных и всехвальных Апостол, преподобных и Богоносных отец наших и всех святых, помилуй и спаси нас, яко Благ и Человеколюбец.

Закон Божий


Яндекс.Метрика